|
Baiona-Donostiako herritarrentzat mugaz
bestaldean lan egitea aukera bideragarria
eta erakargarria izango al da?
Galdera horri erantzun asmoz hainbat
aditurengana jo du Gaindegiak.
Mugaz bi aldeetako hamaika adituri
eskatu diote iritzia. Batetik, Hegoaldeko
lan merkatua dinamikoagoa eta
handiagoa izanda eta, bestetik, langileen
mugikortasuna Lapurditik Gipuzkoara
izateko aukerak handiagoak izango direlakoan,
elkarrizketa gehiago egin dituzte
Iparraldean.
Galdera sorta bana igorri
diete guztiei eta euren erantzuna aztertu
ostean atera dituzte txosteneko ondorio
nagusiak.
Baiona-Donostia euro-hiriak aukera
ugari zabalduko ditu mugaz bestalde lan
egiteko. Bat datoz horrekin aditu guztiak. |
|
Europako Batasunetik iritsitako joerak ere lagungarriak izango
direla uste dute gehienek, gainera, bi arrazoigatik. Batetik,
Lisboako Estrategiak Hegoaldeko lan merkatua erakargarriago
bihurtzen lagunduko dutelakoan daude. Orain, Hegoaldeko
lan merkatua dinamikoa izan arren, bertako lan baldintzak
eskasegiak dira mugaz bestaldekoentzat. Baina aditu batzuen
ustez Europako Batasunak sustatutako ezagutzaren ekonomiara
salto egiten bada, kalitatezko lanpostuak sortuko dira,
eta horrek sendotu egingo du erakargarritasuna. Halere,
epe laburrera Lisboako Estrategiak eraginik izango
ez duela uste duten adituak ere badira.
Bestetik, Bruselatik bultzatzen ari diren harmonizazio
politikak lagungarriak dira, oztopo administratiboak
gainditzera baitatoz hein handi batean. Mugen arteko lankidetza
eta mugikortasuna bultzatzea da Europako Batasunaren
helburuetako bat, eta horrek abantailak ekarriko
ditu. Halere, administrazioek behar adinako ahalegina
egiten ez duten ustea gailentzen da. Batzuek Hegoaldeko
administrazioaren borondaterik ezari egozten diote
errua; besteek, Iparraldekoari; eta gainerakoek, biei.
Baina muga administratiboak bezain garrantzitsuak
dira muga psikologikoak eta kulturalak, baita Lapurdi eta
Gipuzkoako biztanleen artean ere. Identitate komun bat
egon badago mugaren bi aldeetan, baina pentsamendu
kolektiboan mugaz beste aldean dagoena ez da existitu
ere egiten gehienentzat. Lan postuak bilatzean, ikasketak
aukeratzean… geografikoki kilometro batzuetara soilik
dagoen errealitate hori ez da kontuan hartzen.
Muga horiek guztiak gaindi daitezke. Aldaketa, ordea,
motela iragartzen dute, eta guztion lana eta inplikazioa
ezinbestekoa izango da. Egoera politikoak eta ekonomikoak
prozesua bizkortuko luketela diote batzuek:
Euskal Herriaren egituraketan aurreratuko balitz,
nabarmen ekarriko luke mugikortasuna handitzea,
eta ekonomian hobekuntza edo krisi bat egongo
balitz ere, bizkortu egingo litzateke prozesua.
Egoerak egoera, beste hainbat faktoretan ere
aurrerapausoak eman beharko dira, dena den. Argi
dute adituek: hizkuntza politika, hezkuntza sistema,
mugaren alde batetik besterako garraio publikoa…
horiek guztiak mugaz bestaldeko lan merkatura
begira egokitzea ezinbestekoa izango da mugaz
bestalde lan egitea bideragarri eta erakargarri
izan dadin.
Amaia Elizagarateren zuzendaritzapean egin
da azterketa, eta landa lana Eneko Gorrik eta Lur
Etxeberriak
egin dute.
Ikerketa
Gaindegiak eta HEMEN elkarteak
euro-hiriaren lan
merkatua aztertzeko elkarlanean
egindako lan zabalago
baten atal bat da eta Akitania-
Euskadi diru-funtsaren
laguntza jaso zuen. |
|
Pdf-an GAINDEGIA TXOSTENA 2008ko edukia.
|
Irakurri beste azterketak.
Menu orokorrera itzuli.
| Txostena | Tamaina |
|---|---|
| GT08_Azterlanak_LanMerkatuaMugazgain.pdf | 390.41 KB |
400 irakurketa
