|
Lurralde Antolamendua politikariek
eta gizarte eragileek hitzetik
hortzera erabiltzen duten terminoa
da. Baina herritar askok ez daki
zehazki zer den eta ez du ezagutzen
Euskal Herrikoa nolakoa den,
nahiz eta susmatzen duen gauza
asko ez direla behar bezala egiten.
Susmo horiek baieztatzera dator
lan hau. Euskal Herriko Lurralde
Antolamendu politika ulertzeko
moduan azaldu eta bere hainbat
akats eta kontraesan agerian uzten
ditu, kasu praktikoen bitartez.
Manu Robles-Arangiz
institutuak kaleratu du
lana, eta Iñaki Lasagabaster
Herrartek idatzi. |
|
Energia eta parke
eolikoen eraikuntza politikan,
Elgeako parke
eolikoaren kasuan izandako
ezbaia da aipatzen
duen adibideetako bat. Azalera
handien kasuan Gorbeia
merkataritza gunearekin
gertatutakoa aztertzen du.
Eta Bastidako Golf zelaiaren
kasua ere aipatzen du, besteak
beste. Euskal Herrian ere hirigintzaren funtzio publikoan
pribatizatzea eta etxebizitzen politiketako ilun eta itzalak egon
badaudela erakusten du azterlanak.
Kasu praktiko horiek behar bezala ulertzeko egileak lanaren
lehen zatian beharrezko azalpen teorikoak ematen ditu, eta horri
esker, ulergarriagoa egiten da azterlana. Horretarako, Lurralde
Antolamendua zer den zehaztasunez azaltzen du aurrena.
Kontzeptua ikuspuntu juridikotik aztertzen du, Lurralde Antolamendu
arauen bilakaera nolakoa izan den azaltzeko, gaur
egun Europan erabiltzen den definiziora iritsi arte.
Azalpen teorikoekin jarraituz, Euskal Herrian Lurralde Antolamenduak
izandako bilakaera ere adierazten du bigarren zatian.
Horretarako, Euskal Herriko Lurralde Antolamendu hori
arautzen duten arauak aztertzen ditu, lurraldeen arteko desberdintasunak
agerian uzteko. Euskal Autonomia Erkidegoan,
Nafarroa Garaian eta Iparraldean arau ezberdinek xedatzen
dute Lurralde Antolamendua, eta lurralde guztiak hartzen dituen
administrazio antolakunderik edo egiturarik ez dagoenez,
ezin da Lurralde Antolamendurik taxutu, ezta orientabide gisa
ere. Hala ere, azterlan honek agerian uzten du arau ezberdinak
izanda ere, arazoak edo gabeziak administrazio guztietan
daudela.
Egungo politiken ilun eta itzalak mahai gainean jarri baino
gehiago egiten du, ordea, lanak. Euskal Herriko Lurralde Antolamendu
politikaren akats horiek argitzeko ideiak ere biltzen
ditu. Horretarako, honako proposamen hauek egiten ditu: batetik,
Lurralde Antolamendurako beharren eta egoeren araberako
plangintza orientagarri eta lotesleak ahalbidetzeko tresnak
eratzeko premia nabarmentzen du. Horrekin batera, benetako
demokrazia eta eraginkortasuna bermatzeko moduko informazio
eta parte hartze sistemak antolatzea ezinbestekotzat
jotzen du, baita Lurralde Antolamenduan eta hirigintza arloan
hartzen diren erabakien ondorioak aztertzea ere. Azkenik, Lurralde
Antolamendurako politika eta ingurumen politika indartzea
ere beharrezkoa iruditzen zaio.
Euskal Herriko Lurralde Antolamendu politikak aldatzeko
premia agerikoa da, beraz. Arauen definizio eta zehaztasun
eskasiaren ondorioz, eta bere funtzio publikoaren benetako
izaera alde batera utzi izanak ekarrita, ilunera bidean ikusten
du egungo politika, eta errotik aldatzeko eskaera egiten du
egileak. |
|
Pdf-an GAINDEGIA TXOSTENA 2008ko edukia.
|
Irakurri beste azterketak.
Menu orokorrera itzuli.
| Txostena | Tamaina |
|---|---|
| GT08_Azterlanak_LurraldeAntolamendua.pdf | 2.5 MB |
363 irakurketa
