Albisteak

2007 urteko helburuak: behategia

2007. urterako Gaindegiak helburu nagusi bat du, BEHATEGIA egikaritzea. Horiek horrela, elkartearen aurtengo esfortzu gehienak horretara mugatuko dira.

Ikus 2007ko helburuak hemen.

Demografia dosierra

Euskal Herriko demografia eta ugalkortasunaren inguruko datu estatistikoak, prospekzio demografikoa, iritzi artikuluak... Gaindegiako demografia dosierrean.

Ikus dokumentazio guztia: hemen.

Gaindegia sariketa ekonomia eta gizarteari buruzko lanetarako

Gaindegiak, Euskal Herriaren ekonomia eta gizartearen errealitatea ezagutu eta aztertzeko helburuarekin antolatu du sariketa hau. Edonork parte har lezake eta lanak euskaraz, gazteleraz zein frantsesez aurkeztu ahal dira.
Lehen deialdi honetan, Nafarroa Garaia eta gainerako euskal herrialdeen arteko harremanak aztertu nahi ditugu. Bi sari nagusi (1.000 euro eta 500 euro) eta Gazteentzako Sari Berezia (300 euro) izango dira.

Oinarriak

1. Sariketa honetara ekonomia edo gizarteari buruzko lanak aurkeztuko dira; euskaraz, gazteleraz zein frantsesez idatziak. Lanek originalak eta beren zati batean edo osotasunean sekula argitaratu gabeak izan behar dute, eta ez dira onartuko sariren bat jaso dutenak. Guztiz amaituta eta argitaratzeko moduan aurkeztuko dira.


2. Lehiaketan edonork parte har lezake, bereziki ekonomia nahiz jendarteko gaiak ikertzen dituzten pertsonak, unibertsitateko ikasle eta ikasle taldeak, tesigileak eta doktoreak.


3. Aurtengo gaia bi ikuspegitatik landu daiteke:

-Nafarroa Garaia eta beste edozein euskal lurralderen artean gaur egun dauden harreman eta lotura ekonomiko, sozial edo instituzionalei buruzko arloren bat aztertuz,

-Nafarroa Garaia eta beste edozein euskal lurralderen artean gaur egun dauden berdintasun eta desberdintasunei buruz arloren bat aztertuz.



4. Lanek gehienez 30.000 karaktere eta gutxienez 15.000 izan behar dituzte. Dagozkion irudi eta grafikoak eranskin modura gehituko dira eta ez dira kontuan hartuko lanen luzera neurtzeko.


5. Lanak 2007ko martxoaren 31a baino lehen bidali behar dira (sei kopia, euskarri digitala eta egile(ar)en datuak dituen gutun-azala) Gaindegiaren egoitzara: Martin Ugalde Kultur Parkea, 20140 ANDOAIN.



(a) Lanak egile(ar)en goitizenez aurkeztu behar dira eta goitizen bera duen gutun-azal itxi baten barruan egile(ar)en izen abizenak, helbidea(k), nortasun agiri(ar)en fotokopia(k) eta harremanetarako telefonoa eta posta elektroniko helbidea(k) sartu behar dira.




(b) 2006an 23 urte edo gutxiago dituzten egileek goitizenaren ondoan ipini behar dute, Gazteentzako Sari Berezian lehiatu ahal izateko.



6. Epaimahaikoen erabakia 2007ko ekainaren 1a baino lehen emango da aditzera.

(d) Epaimahaia ekonomia, jendartea zein kazetaritzako adituek osatuko dute eta Gaindegiak izendatuko du.




(e) Epaimahaiak honako irizpideak izango ditu kontuan saria emateko: berehala argitaratzeko beharrezko egitura, aurkezpena eta akabera izatea; datu estatistikoen erabilera, analisia eta lanketa; hizkuntza maila; lanaren originaltasuna.




(f) Epaimahaikoen erabakiak onartu beharrekoak dira eta sariak eman gabe gera daitezke.



7. Bi sari nagusi eta gazteentzako sari berezi bat izango dira:

·Lehen saria: 1.000 €

·Bigarren saria: 500 €

·Gazteentzako Sari Berezia: 300 €




(g) Gazteentzako Sari Berezia deialdia egiten den urtean 23 urte edo gutxiago dituzten egileen arteko lan onenari emango zaio, baldin eta sari nagusietako bat lortu ez badu.




(h) Sari kopuruari eta sarien zenbatekoari buruzko azken hitza Gaindegiak izango du, eta aldaezina izango da. Sariak eman gabe gera daitezke.



8. Gaindegiak saritutako lanak argitaratzeko konpromisoa hartzen du.



(i) Gaindegiak bere gain hartzen du saritutako lanak argitaratzeko eskubidea. Eta saririk jaso ez dutenak ere Gaindegiak argitaratu ahal izango ditu horretarako egokiak direla ikusiz gero. Argitalpen eskubidea urtebetekoa izango da eta hortik eratorritako argitalpenek ez dute egile eskubiderik izango.




(j) Lanen jabetza egile(ar)ena izango da.




(k) Saritutako lanak gizarteratzean, nahitaez egin beharko da irabazitako sariaren aipamena.




(l) Aurkezten diren lan guztiak Gaindegiaren webgunean eskuragai izango dira.



9. Sariketara aurkezten diren lanak ez dira itzuliko.


10. Sariketari buruzko argibideak Gaindegiari eska dakizkioke (943 304 365 / bulegoa@gaindegia.org).


11. Bestelako ezustekorik sortzen bada, Gaindegiak ebatziko du.


12. Sariketara aurkezteak berez dakar berekin bertako oinarriak eta ondorengo eskubide nahiz betebeharrak onartzea. Gaindegiak ez du erantzukizunik bere gain hartuko egileek arauen bat betetzen ez badute eta, gainera, dirua itzultzeko eska lezake emanda balego.

Oinarri hauek PDF-an jaitsi daitezke hemen bertan

Laborantza dosierra liburuxka batean laburbilduta

Gaindegiak argitaratutako liburuxka honek laborantza datu nagusienak laburbiltzen ditu.

Ikus liburuxka esteka honetan.

Euskal Herriko laborantza datuak: udalerri mailarainoko indizeak, azterketa estatistikoa

Gaindegiak Euskal Herriko laborantzako datuak argitaratu ditu.

Datu hauek azken hiru hamarkadetako bilakaeraren argazkia egiten dute.

Lan honek euskal Herri osoko datuak eskaintzeaz gain udalerri, eskualde eta herrialde mailan ere eskaintzen ditu. Europako Batasuneko estatuen indizeekin alderatzeko moduan eskainita daude.

Udalerri mailarainoko indize estatistikoak ikusteko jo www.datutalaia.net web orrira, eta azterketa estatistikoa kontsultatzeko aukera, berriz, www.gaindegia.org/eu/dosierra helbidean.

"Ugalkortasunaren auzia etorkizuneko Euskal Herrian"

Gaindegiak Euskal Herriko demografiaren inguruko jardunaldia antolatu du lehenengo aldiz eta honen helburua Euskal Herriko oraina zein etorkizun hurbila nolakoak izango diren irudikatzeko demografiaren bilakaera aztertzea da.

Besteak beste, umeak izateko edota ez izateko erabakian eragina izan dezaketen faktoreetaz arituko gara, hala nola ekonomia, denboraren erabilpena, genero eta belaunaldien arteko harremanak edota norberaren bizitzaren inguruko igurikimenak.

Egitaraua

• 09:00 Dokumentazioa jaso.
• 09:30 Sarrera hitzaldia: Euskal Herriko demografia zertan den (Ane Larrinaga eta Mila Amurrio, EHUko irakasleak).
• 10:00 Euskal Herriko demografia eta ugalkortasuna, ezagutu beharreko datuak (Amaia Elizagarate, soziologoa, Gaindegia)
• 11:20 ATSEDENALDIA
• 11:50 Prospekzio demografikoa. Zer datorkigu? (Marta Luxan, EHUko irakaslea)
• 13:30 AMAIERA

Jarraian, jardunaldiren inguruko xehetasunak.

Eguna:

urriaren 20a

Lekua:

BBK eta UPV-EHUko Bilboko egoitza nagusia (Banco España 2)

Ordua:

09:00etatik 14:00etara

Hizkuntza:

euskara

Matrikula:

6 euro aurretik ordainduz, 10 euro egun berean

Izena emateko:

jardunaldia@gaindegia.org

Antolatzailea:

Gaindegia

Laguntzaileak

UPV-EHU

Diptikoa, hizlarien edukien laburpena eta egunean bertako ondorioak batzen dituen prentsa oharra PDF formatuan jaisteko aukera hemen.

"Historian lehen aldiz, 3 milioiko muga gainditu dugu"

Historian lehenengo aldiz, 3 milioiko biztanleen muga gainditu dugu. Ia ehun urteko epean milioi bat biztanle izatetik kopuru hori hirukoiztera igaro gara.

Datuen iturria:INE eta INSEE.

Populazio hazkundearen bilakaeraren inguruko datu gehiago nahi izanez gero, jaitsi PDF-a.

Gaindegiak Euskal Herriak Europan duen lekua aztertu du

GAINDEGIAk "Euskal Herria, Europako Batasuneko hego-mendebaldeko nazioa" liburua argitara eman du. Bertan Euskal Herriak Europako Batasunaren baitan nazio gisa izan ditzakeen aukerak eta arriskuak aztertzen dira eta, lurralde banaketari dagokionez, gune anitzeko hiri-erregioa ereduaren aldeko apustua egiten da.

Liburua GAINDEGIAko bazkideen barne mintegiaren fruitua da, hainbat hilabeteko hausnarketa prozesuaren ekarpena. Hiru arlo aztertzen ditu nagusiki: Euskal Herriaren izaera eta egungo egoera, Europako Batasunaren egituratze prozesuan dituen aukerak eta arriskuak, eta aurrera begira Euskal Herriaren eraketa eta garapenerako izan ditzakeen ereduak.

Ildo horretan, lurralde banaketa eredu zehatz baten alde egiten du ekarpen honek, gune anitzeko hiri-erregioa delakoaren alde, alegia. Eredu hau hainbat hirik osatutako sistema batean oinarritzen da, hiri edo metropoli erraldoi bat indartu beharrean, ingurune bateko hiribilduak indartzen ditu, unitate bezala lurralde guztia hartuta. Hori da, liburuan azaltzen denez, Euskal Herriaren ezaugarrietara hoberen egokitzen den formula, eta posible da.

"Euskal Herria, Europako Batasuneko hego-mendebaldeko nazioa"-ren argitalpenak Begi Saila abian jarri du. Liburu bilduma honetan GAINDEGIAK bere baitan sustatzen dituen gogoeta prozesuen emaitzak jasoko ditu, hiru hizkuntzatan (euskara, frantsesa, gaztelera). Lehenengo alea bulegoaren bitartez eskura daiteke eta, nahiago izanez gero, webgune honetan jaitsi daiteke, PDF formatoan. Esteka batean eskura dituzu liburua bera, jatorrizko txostena (luzeagoa) eta bazkideen idatzizko ekarpenak. Informazio gehiago.

Eskualdeetako errealitate sozio-ekonomikoa liburu bakarrean

Ipar Hegoa Fundazioak eta Gaindegiak elkarlanean egin duten “Euskal Herria eskualdeka. Egoera sozio-ekonomikoaren argazkiak” liburua aurkeztu dute. Argitalpen honetan Euskal Herriko eskualde guztietako hainbat arlo sozio-ekonomikotako datu interesgarriak ezagutzera ematen dira.

Liburuaren oinarrian Berria egunkariak 2004-2005 ikasturtean Egitura gehigarri ekonomikoan argitaratu zuen artikulu saila dago. Orain Ipar Hegoa fundazioak eta Gaindegiak artikulu sail hori liburu moduan eta hiru hizkuntzatan (euskara, frantsesa eta gaztelania) eskaintzen du, Euskal Herria ezagutu nahi duen guztientzat modu erraz eta atseginean eskuragarri. Datu horiei guztiei lurralde antolamenduari buruzko sarrera bat gehitu dio Gaindegiak.

Bestalde, Gaindegiak artikulu horiek, banan banan jaisteko aukera ere eskaintzen du bere webgunean, norberak bere eskualdeari edo behar duen eskualdeari buruzko informazioa erraz eskura dezan. Eskualdeen zerrendara joan

Liburuaren aurkezpenean Pazis Garcia Ipar Hegoa fundazioko arduradunak, Xabier Isasi Gaindegiako lehendakariak eta Martxelo Otamendi Berria egunkariko zuzendariak parte hartu dute. Hirurek nabarmendu dute Euskal Herri osoko datuak ezagutzea eta biltzea oraindik ere lan nekeza dela, eta horrelako lanak beharrezkoak direla, orain eta gero.

Liburua doakoa da eta udazkenean eragile politiko, sozial eta ekonomikoei, hezkuntza arloko profesionalei eta ikastetxeei banatuko zaie. Bestela, nahi duenak PDF formatoan eskura dezake webgune honetan. Liburuaren PDF-a

EUS-CAT, Mugaz gaineko lurralde antolamenduari buruzko jardunaldiak

GAINDEGIAk lurralde antolamendu eta mugaz gaineko harremanei buruz hausnarketa egiteko jardunaldiak antolatu ditu maiatzean. Euskaldunok eta katalanek mugak ezartzen digun zatiketa, nahiz horren ondorioak, pairatzen ditugu gure jendarte, kultura zein ekonomian. Jardunaldi hauen bitartez, Europaren agertokian normalizazio sozial eta politikoa lortzeko ezinbestekoa izango den debatea sustatu nahi dugu. Euskal Herrian zein Herrialde Katalanetan kohesio soziala ahalbidetuko duen mugaz gaineko lurralde antolamenduaz gogoeta egin nahi dugu.

Mugaz gaindiko errealitatea kontuan hartzen ez duen lurralde antolamenduak arazo sozio-linguistikoak, hezkuntza ereduen bateraezintasuna, hedabideen zabalkunderako mugak, ekonomia arloko edo instituzioen arteko elkarlanerako trabak, edota azpiegitura komunak eratzeko oztopoak dakartza. Hala ere, Europako Batasunaren garapenak eta zenbait eragileren esperientziak erakutsi dute elkarlanaren bidea jorratuz mugak eragindako zatiketa gaindi daitekeela.

*Data: maiatzak 5 eta 6.
*Lekua: Andoain. Martin Ugalde Kultur Parkea.
*Matrikularen prezioa: 30 euro (bazkaria barne) / Bazkideentzat: 15 euro.


PROGRAMA

Maiatzak 5
18:00: Ongi etorri: Antton Lafont, Gaindegiako bazkidea eta Euskadiko Ekonomia eta Gizarte Arazoetarako Batzordeko (EGAB/CES) lehendakaria
18:15: 1. mintegia, Hezkuntza eta hizkuntza. Hizlariak:
·Lore Erriondo, UEUko zuzendaria
·Alà Baylac Ferrer, Cereteko institutuko irakaslea
·Joan Peytavi Deixona, Perpinyà-ko unibertsitateko irakaslea
Maiatzak 6
9:30: 2. mintegia, Kultura eta hedabideak. Hizlariak:
·Martxelo Otamendi, Berriako zuzendaria
·Esteve Valls, kazetaria


11:00: Atsedenaldia
11:30: Liburu aurkezpena: "Acción colectiva hegoalde-iparralde" (2006, Fundamentos), Francisco Letamendia. Hizlariak:
·Francisco Letamendia, ikerlari mugaz gaineko gaietan
·Xabier Isasi, Gaindegiako lehendakaria
·Anton Borja, Gaindegiako bazkide eta ekonomian doktorea
·Igor Ahedo, ikerlari mugaz gaineko gaietan


14:00: Bazkaria
16:00: 3. mintegia, Ekonomia. Hizlariak:
·Anton Borja, ekonomian doktorea
·Joan Francesc Castex Ey, mugaz gaineko eta Europako gaietan aditua


17:30: Mahai ingurukoa: Zein lan ildo behar du Euskal Herria eta Països Catalansetako kasuetan kohesioa helburu duen politika batek? Hizlariak:
·Antton Lafont, Gaindegiako bazkidea eta EGAB/CES-eko lehendakaria
·Francisco Letamendia, ikerlari mugaz gaineko gaietan
·Joan Francesc Castex Ey, mugaz gaineko eta Europako gaietan aditua


19:00 Amaiera

*Metodologia: Hizlari bakoitzak 20 minutuko sarrera egingo du eta ondoren eztabaidarako txanda irekiko da parte hartzaile guztien artean.
Izen ematea

Euskal Herriko datu estatistikoak

Ikusgai dago Euskal Herriko Datuen Talaia izeneko webgunea. Bertan beste inon topatuko ez dituzun Euskal Herri osoko hainbat datu estatistikoak biltzen dira: www.datutalaia.net

GAINDEGIAren aurkezpena

GAINDEGIA, Euskal Herriko ekonomia eta gizarte garapenerako behategiak agerraldi soziala egin du bere burua jendartean ezagutzera emateko. Agerraldia urtarrilaren 21ean izan zen Miramon Teknologi Elkartegian.

Euskal Herriko egitura adierazleak

Bizkaia eta Euskal Herriko egitura adierazleen azterketak adierazten digu 2000. urteko Lisboako Estrategien helburuetako sailkapenaren arabera gure batez besteko egoera tartekoa dela.

Ikus txostena helbide honetan.

Ipar Euskal Herriko ekonomia aztertzen

Gaindegiak sortutako azken dosirrean Ipar Euskal Herriko ekonomiaren ezaugarri nagusiak aztertu eta adierazle ekonomiko nagusien datuak aurkezten dira besteak beste.

Ikus dosierra.