Adierazle ekonomikoei erreparatuta, 2004-2007 epealdian biztanleko sortutako aberastasuna handia da eta Europar Batasuneko bataz bestekoa erraz gainditzen du (5.000 euroko aldea); Japoniakoa ere atzean uzten du. Hala ere, ez da AEBko mailara iristen. Euskal Herriko produktibitateari dagokionez, EBko mailatik gora dago; azken urteotan (2004-2007) tartea handitzen joan da (7 puntu). Bestalde, esportazioen eta inportazioen gorakadak euskal ekonomiak hedatzeko eta lehiatzeko duen gaitasuna erakusten du. Urtebetean, esportazioak %7,8 hazi dira BPGarekiko, eta inportazioak, berriz, %7,4. Krisi garaian kanpoaldearekiko sustatutako mendekotasunak, ordea, hauskor eta zaurgarri bihur ditzake oinarri ekonomiko sendo horiek. Bestalde, enpresa inbertsioa euskal BPGaren laurdena izan da 2004. urtean. I+Gko gastua BPGaren %1,6ra iritsi da 2006an eta Europako Batasunekoaren mailara hurbildu da. Datuak positiboak izan arren, ez digute berrikuntza sistemaren eragileen arteko harremanen trinkotasunari buruzko informazio zehatzik ematen. Izan ere, enpresek, unibertsitateek eta erakundeek berrikuntza sistema sendotu eta sustatzeko dituzten konpromisoak aztertu beharko lirateke.